مستەفا تەها بەڕێوەبەری دابەشکردنی نەوتی هەولێر لە کۆنگرەیەکی ڕۆژنامەوانیدا بە نوێنەرایەتی پارێزگاری هەولێر ڕایگەیاند، لەمەودوا نرخی بەنزین ٦٥٠ دینار دەبێت.
هێرش قادر - هەولێر
مستەفا تەها بەڕێوەبەری دابەشکردنی نەوتی هەولێر لە کۆنگرەیەکی ڕۆژنامەوانیدا بە نوێنەرایەتی پارێزگاری هەولێر ڕایگەیاند، لەمەودوا نرخی بەنزین ٦٥٠ دینار دەبێت.
ئاماژەی بەوەش کرد، پارێزگای هەولێر لەگەڵ بەغدا ڕیککەوتووە بۆ چارەسەرکردنی کێشەی نرخی بەنزین و لەمەودوا نرخی یەک لیتر بەنزین دەکرێتە ٦٥٠ دینار و لە وێستگەکانی "ڕزگاری و شۆڕش و عەنکاوە" دابەشدەکرێت.
بەڕێوەبەری دابەشکردنی نەوتی هەولێر ئاماژەی بەوەش کرد، ئەو وێستگانە تایبەتن بە ئوتۆمبێلەکانی جۆری پاس و تەکسی و دەتوانن لەمەودوا سوودمەندبن لەو نرخە تازەیە.
ئەوە لەکاتێکدایە لە دوو هەفتەی ڕابردوودا بڕیاربوو حکومەتی عێراق بڕی ٥ ملیۆن لیتر بەنزین ڕەوانەی هەرێمی کوردستان بکات، بەڵام ئەنجومەنی پارێزگای سلێمانی ڕایگەیاند، بەهۆی خراپی کوالێتی بەنزینەکەوە ئامادە نییە ئەو بەنزینە وەربگرێت.
لە ئێستادا بڕیارە ڕۆژانە بڕی زیاتر لە ٢ ملیۆن لیتر بەنزین بگاتە شاری هەولێر و لە چەند بەنزینخانەیەکی حکومی دابەشبکرێت.
لە ئێستادا لە سنورى قەڵەمڕەوى حکومەتى عێراقدا نرخى لیترێک بەنزین نزیکەى نیوەى ئەو نرخەیە کە لە هەرێمدا هەیە، بەجۆرێک یەک لیتر بەنزین لە ناوچەکانى ناوەڕاست و باشورى عێراق تەنها ٤٥٠ دینارە، بەڵام لە ناوچەکانى ژێر دەسەڵاتى حکومەتى هەرێم بەنزینێک کە هەمان کوالێتى هەبێت لیترێکى بە ٧٥٠ دینارە، ئەم نرخە بەرزەش بۆتە بارگرانییەکى تر بۆسەر شانى خەڵکى هەرێمێکى دەوڵەمەند بە نەوت.
ع.م