سەردێڕ:

هەشت تەرم لە سنوری دووزخورماتوو دۆزرانەوە

فۆتۆ: 
2018-06-27

5560 جار خوێندراوەتەوە

لە سنوری دووزخورماتوو تەرمی ٨ هاووڵاتی دۆزراونەتەوە، کە پێدەچێت تەرمی ئەو کەسانەبن کە چەند ڕۆژێک لەمەوبەر لەلایەن گروپێکی چەکدارەوە فڕێنرابوون و خەڵکی ناوچەکە بە چەکداری داعشی زانیوون.


ئاسۆ ئەحمەد – کەرکوک

لە سنوری دووزخورماتوو تەرمی ٨ هاووڵاتی دۆزراونەتەوە، کە پێدەچێت تەرمی ئەو کەسانەبن کە چەند ڕۆژێک لەمەوبەر لەلایەن گروپێکی چەکدارەوە فڕێنرابوون و خەڵکی ناوچەکە بە چەکداری داعشی زانیوون.

عەلی هاشم وتەبێژی هێزەکانی حەشدی شەعبی لە میحوەری دووزخورماتوو بە ئێن ئاڕ تی ڕاگەیاند، تەرمی ٨ هاووڵاتی لە سنوری گوندی ئینجانەی سەربە قەزای دووزرخورماتوو دۆزراونەتەوە کە پێدەچێت سێ ڕۆژ لەمەوبەر کوژرابن و بەشێک لە جەستەیان شێوێنراوە.

لەلایەکی ترەوە عەلی بەیاتی ئەندامی کۆمسیۆنی باڵای مافی مرۆڤی عێراق ڕایگەیاند، زانیارییان لە سەرچاوە ئەمنییەکانەوە پێگەیشتووە، کە ئەو تەرمانەی کە لەو سنورە دۆزراونەتەوە، تەرمی ئەو هاووڵاتییانە بوون کە چەند ڕۆژێک لەمەوبەر لەسەر ڕێگای کەرکوک بەغدا فڕێنرابوون.

ئەوە لەکاتێکدایە لە ماوەی چەند ڕۆژی ڕابردوودا ژمارەیەک چەکدار کە خەڵکی ناوچەکە بە چەکداری داعشی زانیوون، لەسەر ڕێگای کەرکوک بەغدا ژمارەیەک هاووڵاتییان فڕاندووە و لەو ڕۆژەوە بێسەروشوێنن.

لە ماوەی دوو مانگی ڕابردوودا چەکدارانی داعش لە سنورەکانی باشووری شاری کەرکوک و پارێزگای سەلاحەدین و دیالە، سەریانهەڵداوەتەوە و ناوبەناو هێرش و کرداری فڕاندن و کوشتن دەرهەق بە هاووڵاتییانی مەدەنی و هێزە ئەمنییەکان ئەنجامدەدەن.

ع.م