سەردێڕ:

ئەمریکا و ئیسرائیل لەسەر خۆپیشاندان و ناڕەزایەتییەکانی ئێران هاتنەدەنگ

فۆتۆ: 
2018-06-27

13772 جار خوێندراوەتەوە

وەزارەتی دەرەوەی ئەمریکا ڕەخنەی لە دەسەڵاتدارانی ئێران گرت کە خراپ سود لە سەرچاوە داراییەکانی وڵاتەکە دەبینن و دەستوەردان دەکەن لە ناکۆکییەکانی ناوچەکەدا، هاوکات وەزیری بەرگری ئیسرائیلیش ڕایگەیاند، ئێران بە ملیارەها دۆلار بۆ گروپەکانی سوریا و عێراق و فەلەستین و یەمەن دەنێرێت.


وەزارەتی دەرەوەی ئەمریکا ڕەخنەی لە دەسەڵاتدارانی ئێران گرت کە خراپ سود لە سەرچاوە داراییەکانی وڵاتەکە دەبینن و دەستوەردان دەکەن لە ناکۆکییەکانی ناوچەکەدا، هاوکات وەزیری بەرگری ئیسرائیلیش ڕایگەیاند، ئێران بە ملیارەها دۆلار بۆ گروپەکانی سوریا و عێراق و فەلەستین و یەمەن دەنێرێت.

وەزارەتی دەرەوەی ئەمریکا ئەمڕۆ چوارشەممە لە بەیاننامەیەکدا ڕایگەیاند، حکومەتی ئێران داهاتی گەلەکەی لەڕێگەی سەرکێشییەکانی لە پشتیوانیکردنی حزبوڵا و بزووتنەوەی حەماس و حوسییەکان و خواستە ئەتۆمییەکانی خەرجدەکات.

وەزارەتی دەرەوەی ئەمریکا ئاماژەی بەوەش کردووە، ئەو هەوڵانە دەبێتە مایەی زیادبوونی قەیران و کێشەکانی گەلی ئێران لەبەرئەوە نابێت کەس دووچاری سەرسوڕمان بێت سەبارەت بە بەردەوامی ناڕەزایەتییەکانی ئێران.

جەختیشی لەوە کردووەتەوە، گەلی ئێران داوادەکات سەروەت و سامانەکەی بەهەدەرنەدرێت و بە شێوەیەکی دادپەروەرانە دابەشبکرێت، پێویستیشە سەرکردەکانی ئێران وەڵامی داخوازییە ڕەواکانی گەلی وڵاتەکەیان بدەنەوە.

لە بەشێکی تری بەیاننامەکەی وەزارەتی دەرەوەی ئەمریکادا ئاماژە بەوە کراوە، نوێبوونەوەی خۆپیشاندان و ناڕەزایەتییەکانی هاووڵاتییانی ئێران، مەترسییەکانی کۆمەڵگەی ئەو وڵاتەدا دەردەخات لەو دۆخە ئابوورییە قورسەی کە بەسەریانداهاتووە.

لە کۆتایی بەیاننامەکەدا ئاماژە بەوە کراوە، گەلی ئێران هیلاک بوون لەدەست گەندەڵی و زوڵم و ستەمی دەسەڵاتداران و لە ئێستادا جیهان گوێبیستی گەلی ئێرانە.

لەلایەکی ترەوە ئەفیگدۆر لیبرمان وەزیری بەرگری ئیسرائیل لە نامەیەکدا بۆ گەلی ئێران بە زمانی فارسی نوسیوویەتی، ئایا دەزانن داهات و سامانەکەتان بۆ کوێ دەچێت؟

ئاماژەی بەوەش کردووە، سەرباری قەیرانی ئابووری لە ناوخۆیی ئەو وڵاتەدا، دەسەڵاتدارانی ئێران بەردەوامن لە ناردنی ملیارەها دۆلار بۆ سوریا و عێراق و فەلەستین و یەمەن.

ئاماژەی بەوەش کردووە، ئێران لەمساڵدا بەڵێنی داوە بە دابینکردنی بڕی ٢ ملیار و ٥٠٠ ملیۆن دۆلار بۆ هەریەکەیان و لە چەند ساڵی ڕابردوودا ئێران بڕی ١٤ ملیار دۆلاری لە سوریادا خەرجکردووە.

لە بەشێکی نامەکەی وەزیری بەرگری ئیسرائیل بۆ ئێرانییەکان نوسیویەتی "لەکاتێکدا ئێوە لە شەقامەکاندا شەڕی نانتان دەکرد، قاسم سلێمانی سەرپەرشتی چەندین ئۆپراسیۆنی دەکرد بۆ ناردنی کۆمەکی لۆجستی بە بڕی ٧٠ ملیۆن دۆلار بۆ سوریا".

لە کۆتایی نامەکەیدا وەزیری بەرگری ئیسرائیل ستایشی ڕۆڵی هەڵبژاردەی تۆپی پێی ئێرانی کردووە لە یارییەکانی مۆندیالی ڕووسیا.

ئەوە لەکاتێکدایە ماوەی چەند ڕۆژێکە لە تاران و بەشێک لە شارەکانی ئێران خۆپیشاندان و ناڕەزایی دەستیپێکردووە، لە دژی گرانی کاڵا و شمەک و نزمبوونەوەی نرخی تمەنی ئێرانی.

ع.م